Sizni shunchaki ishdan bo’shatisholmaydi!
⚠️ SHTAT QISQARISHI SABABLI ISHDAN BO‘SHATISHDA XODIMNING HUQUQLARI
Ish beruvchi “shtat qisqardi” deb xodimni istagan vaqtda ishdan bo‘shata olmaydi.
📌 1. Avvalo, qonuniy asos bo‘lishi kerak
Xodimning mehnat shartnomasi shtat yoki xodimlar sonining qisqarishi munosabati bilan bekor qilinishi Mehnat kodeksining 161-moddasi ikkinchi qismi 2-bandi bilan tartibga solinadi.
📌 2. Xodim kamida 2 oy oldin yozma ravishda ogohlantirilishi kerak
Mehnat kodeksining 165-moddasiga ko‘ra, shtat qisqarishi sababli ishdan bo‘shatilayotgan xodim kelgusidagi bo‘shatish haqida kamida 2 oy oldin yozma ravishda ogohlantirilishi kerak.
⚠️ Ogohlantirishni shunchaki og‘zaki aytish yetarli emas.
📌 3. Ish beruvchi boshqa ishni taklif qilishi kerak
Shtat qisqarayotgan bo‘lsa, ish beruvchi xodimga uning mutaxassisligi va malakasiga mos boshqa ishni, bunday ish bo‘lmasa, ish beruvchida mavjud bo‘lgan boshqa ishni taklif qilishi shart.
Bu talab Mehnat kodeksining 144-moddasi bilan bog‘liq.
📌 4. Kimni qisqartirish masalasi ham qonun bilan tartibga solingan
Bir xil lavozimdagi xodimlardan kim ishda qolishi masalasida faqat ish beruvchining xohishi hal qiluvchi bo‘lmaydi.
Mehnat kodeksining 167-moddasiga ko‘ra, avvalo malakasi va mehnat unumdorligi yuqoriroq bo‘lgan xodimning ishda qolish bo‘yicha imtiyozli huquqi mavjud.
Agar malaka va mehnat unumdorligi teng bo‘lsa, qonunda nazarda tutilgan boshqa mezonlar ham hisobga olinadi.
📌 5. Ishdan bo‘shatish kuni hisob-kitob qilinishi kerak
Mehnat shartnomasi bekor qilinganda xodimga tegishli ish haqi va qonunchilikda nazarda tutilgan boshqa to‘lovlar berilishi, shuningdek ishdan bo‘shatish bilan bog‘liq kafolatlar ta’minlanishi kerak.
📌 6. Muhim! 6 oy ichida yana o‘sha ish o‘rni paydo bo‘lsa…
Agar shtat qisqarishi sababli xodim bilan mehnat shartnomasi bekor qilinganidan keyin 6 oy ichida tashkilotda xodim ilgari egallagan mutaxassislik va malaka bo‘yicha bo‘sh ish o‘rni paydo bo‘lsa, ish beruvchi bunday xodimni ishga qabul qilishi shart.
❗️Shuning uchun “shtat qisqardi” degan vajning o‘zi ishdan bo‘shatishni avtomatik ravishda qonuniy qilib qo‘ymaydi.