Оммавий оферта

1. Атамалар ва таърифлар

Платформа — advokatkerak.uz манзилидаги веб-сайт ва унга тегишли дастурий воситалар мажмуи бўлиб, юридик ёрдамга муҳтож шахслар ва адвокатлар ўртасида алоқа ўрнатиш учун ахборот-воситачилик майдончаси вазифасини бажаради.

Мижоз — юридик ёрдам олиш мақсадида Платформада рўйхатдан ўтган жисмоний шахс.

Адвокат — Ўзбекистон Республикасининг «Адвокатура тўғрисида»ги Қонунига мувофиқ адвокатлик фаолияти билан шуғулланиш ҳуқуқига эга бўлган ҳамда Платформада рўйхатдан ўтган шахс.

Фойдаланувчи — Мижоз ва Адвокатнинг умумий номланиши, шунингдек Платформага ташриф буюрган ҳар қандай шахс.

Акцепт — ушбу Оферта шартларини тўлиқ ва сўзсиз қабул қилиш.

Шахсий кабинет — фойдаланувчининг Платформадаги ҳимояланган шахсий саҳифаси.

2. Оферта предмети

2.1. Платформа Фойдаланувчиларга қуйидаги ахборот-воситачилик хизматларини тақдим этади:

• Адвокатларнинг очиқ профиллари (ихтисослик, ҳудуд, тажриба, рейтинг, шарҳлар) жойлаштирилган каталогдан фойдаланиш;
• Мижоз ва Адвокат ўртасида ички чат орқали бевосита алоқа ўрнатиш;
• Адвокатларга ўз профилини жойлаштириш ва потенсиал мижозлар билан боғланиш имконияти;
• рейтинг, баҳолаш ва шарҳлар тизими;
• Telegram орқали билдиришномалар олиш.

2.2. МУҲИМ: Платформа адвокатлик тузилмаси эмас, адвокатлик фаолияти билан шуғулланмайди, юридик хизмат кўрсатмайди ва юридик маслаҳат бермайди. Платформа фақат Мижоз ва Адвокат ўртасида алоқа ўрнатиш учун техник имконият яратади.

2.3. Юридик ёрдам кўрсатиш бўйича муносабатлар бевосита Мижоз ва Адвокат ўртасида, Платформанинг иштирокисиз, улар ўртасидаги алоҳида келишув асосида вужудга келади. Платформа бундай келишувнинг тарафи ҳисобланмайди.

3. Офертани акцепт қилиш тартиби

3.1. Фойдаланувчининг Платформада рўйхатдан ўтиши (Google ёки Telegram ҳисоби орқали тизимга кириши ва профилни тўлдириши) ушбу Офертанинг тўлиқ ва сўзсиз акцепти ҳисобланади ҳамда Фуқаролик кодексининг 370-моддасига мувофиқ шартнома тузилганига тенглаштирилади.

3.2. Акцепт билан Фойдаланувчи шунингдек Платформанинг Махфийлик сиёсати шартларини қабул қилади ва ўз шахсга доир маълумотларини қайта ишлашга розилик билдиради.

3.3. Рўйхатдан ўтиш орқали Фойдаланувчи 18 ёшга тўлганлигини ва муомала лаёқатига эга эканлигини тасдиқлайди.

4. Хизматлар нархи ва ҳисоб-китоб тартиби

4.1. Ушбу Оферта амал қилаётган таҳририда Платформанинг асосий хизматлари Фойдаланувчилар учун бепул тақдим этилади.

4.2. Маъмурият келгусида пуллик хизматларни (масалан, профилни илгари суриш, кенгайтирилган имкониятлар) жорий этиш ҳуқуқини ўзида сақлаб қолади. Пуллик хизматлар жорий этилганда уларнинг тавсифи, нархи ва тўлов тартиби Платформада олдиндан эълон қилинади ҳамда ушбу Офертага тегишли ўзгартиришлар киритилади. Пуллик хизматлардан фойдаланиш Фойдаланувчининг ихтиёрий танловига асосланади.

4.3. Мижоз ва Адвокат ўртасидаги юридик хизматлар учун ҳақ тўлаш масалалари улар ўртасида мустақил ҳал этилади; Платформа бундай ҳисоб-китобларда иштирок этмайди ва улар учун жавобгар эмас.

5. Томонларнинг ҳуқуқ ва мажбуриятлари

5.1. Маъмурият мажбуриятлари:

• Платформанинг ишлашини техник жиҳатдан таъминлаш (техник ишлар ва узрли сабабларга кўра узилишлар бундан мустасно);
• Фойдаланувчиларнинг шахсга доир маълумотларини Махфийлик сиёсатига мувофиқ ҳимоя қилиш;
• шикоятларни кўриб чиқиш ва қоидабузарликларга чоралар кўриш.

5.2. Маъмурият ҳуқуқлари:

• Оферта шартларини бузган Фойдаланувчи ҳисобини огоҳлантиришсиз чеклаш, тўхтатиб туриш ёки бутунлай блоклаш;
• жойлаштирилган маълумотларни (профил, шарҳ, хабар) қоидаларга зид бўлса ўчириш ёки таҳрирлаш;
• хизматлардан фойдаланиш частотасига техник чекловлар (лимитлар) ўрнатиш;
• Платформани такомиллаштириш, функцияларни ўзгартириш ёки бекор қилиш;
• Адвокатнинг лицензия маълумотларини текшириш ва тасдиқланмагунча профилни фаоллаштирмаслик.

5.3. Фойдаланувчи мажбуриятлари:

• рўйхатдан ўтишда ва профилда фақат ҳаққоний, тўлиқ ва долзарб маълумотларни тақдим этиш;
• ҳисобга кириш воситаларини (Google/Telegram ҳисоблари) сир сақлаш ва учинчи шахсларга бермаслик;
• Платформадан фақат қонуний мақсадларда фойдаланиш;
• бошқа Фойдаланувчиларнинг ҳуқуқлари ва қадр-қимматини ҳурмат қилиш.

5.4. Адвокатнинг қўшимча мажбуриятлари:

• амалдаги адвокатлик лицензиясига (гувоҳномасига) эга бўлиш ва унинг ҳақиқий маълумотларини кўрсатиш;
• лицензия бекор қилинган ёки тўхтатилган тақдирда бу ҳақда Маъмуриятни дарҳол хабардор қилиш ва Платформадаги фаолиятни тўхтатиш;
• касбий одоб-ахлоқ қоидаларига ва «Адвокатура тўғрисида»ги Қонун талабларига риоя этиш;
• адвокатлик сири режимига риоя қилиш.

6. Тақиқланган ҳаракатлар

6.1. Фойдаланувчига қуйидагилар тақиқланади:

• сохта, чалғитувчи маълумотлар тақдим этиш, ўзини бошқа шахс деб кўрсатиш, адвокат бўлмаган ҳолда адвокат мақомини даъво қилиш;
• ҳақоратомуз, таҳдидли, туҳмат характеридаги, экстремистик ёки қонунга зид мазмундаги хабарлар юбориш;
• спам тарқатиш, реклама жойлаштириш (Маъмурият розилигисиз), оммавий автоматлаштирилган сўровлар юбориш;
• Платформанинг дастурий таъминотига зарар етказишга уриниш, хавфсизлик тизимларини четлаб ўтиш, бошқа фойдаланувчилар маълумотларига рухсатсиз киришга ҳаракат қилиш;
• рейтинг ва шарҳлар тизимини сунъий равишда бузиш (сохта шарҳлар, келишилган баҳолаш);
• Платформа контентини Маъмурият розилигисиз нусхалаш ва тижорат мақсадларида фойдаланиш.

6.2. Ушбу бўлим талаблари бузилганда Маъмурият ҳисобни вақтинча ёки доимий блоклаш, шу жумладан қайта рўйхатдан ўтишнинг олдини олиш чораларини қўллаш ҳуқуқига эга. Қонунбузарлик аломатлари мавжуд бўлса, материаллар ваколатли органларга тақдим этилиши мумкин.

7. Рейтинг, шарҳлар ва шикоятлар

7.1. Мижозлар Адвокат билан ҳақиқий мулоқотдан сўнг унга баҳо қўйиши ва шарҳ қолдириши мумкин. Адвокатнинг умумий рейтинги барча баҳолар асосида статистик усулда ҳисобланади.

7.2. Шарҳ мазмуни учун уни қолдирган Фойдаланувчи жавобгардир. Маъмурият қоидаларга зид шарҳларни ўчириш ҳуқуқига эга, бироқ шарҳларнинг обективлигини кафолатламайди.

7.3. Адвокат Мижознинг номақбул хатти-ҳаракати юзасидан Маъмуриятга шикоят юбориши мумкин. Шикоятлар Маъмурият томонидан кўриб чиқилади ва тасдиқланган қоидабузарлик учун Мижоз ҳисоби блокланиши мумкин.

8. Жавобгарликни чеклаш

8.1. Платформа ахборот-воситачилик хизмати бўлганлиги сабабли Маъмурият қуйидагилар учун жавобгар эмас:

• Адвокат томонидан кўрсатилган юридик хизматларнинг сифати, муддати, натижаси ва оқибатлари;
• Фойдаланувчилар томонидан тақдим этилган маълумотларнинг ҳаққонийлиги (Маъмурият лицензия маълумотларини имкон қадар текширади, бироқ мутлақ кафолат бермайди);
• Мижоз ва Адвокат ўртасидаги келишувлар, ҳисоб-китоблар ва низолар;
• Фойдаланувчининг Платформадан фойдаланиш ёки фойдалана олмаслик натижасида кўрган билвосита зарарлари;
• учинчи шахслар хизматларидаги (Google, Telegram, ҳостинг-провайдерлар) узилишлар.

8.2. Платформадаги ҳеч қандай маълумот юридик маслаҳат сифатида талқин этилмаслиги керак. Муайян ҳуқуқий вазият бўйича маслаҳатни фақат малакали Адвокат беради.

8.3. Фойдаланувчи Платформадан «борича» (as is) тамойили асосида фойдаланади. Маъмурият Платформанинг узлуксиз ва хатосиз ишлашини кафолатламайди, бироқ бунинг учун барча оқилона чораларни кўради.

8.4. Ҳар қандай ҳолатда Маъмуриятнинг Фойдаланувчи олдидаги жами жавобгарлиги қонун ҳужжатларида белгиланган доиралар билан чекланади.

9. Интеллектуал мулк

9.1. Платформанинг дастурий таъминоти, дизайни, логотипи, матнлари ва бошқа элементларига бўлган мутлақ ҳуқуқлар Маъмуриятга тегишли бўлиб, Ўзбекистон Республикасининг муаллифлик ҳуқуқи тўғрисидаги қонун ҳужжатлари билан ҳимояланади.

9.2. Фойдаланувчи ўзи жойлаштирган контент (профил маълумотлари, шарҳлар) юзасидан Платформа фаолияти доирасида кўрсатиш учун Маъмуриятга бепул, муддатсиз оддий (ноэксклюзив) лицензия беради.

10. Шахсга доир маълумотлар

10.1. Шахсга доир маълумотларни йиғиш, қайта ишлаш ва ҳимоя қилиш тартиби Платформанинг Махфийлик сиёсатида белгиланган бўлиб, у ушбу Офертанинг ажралмас қисми ҳисобланади.

11. Форс-мажор

11.1. Томонлар енгиб бўлмас куч ҳолатлари (табиий офатлар, давлат органлари қарорлари, оммавий тартибсизликлар, электр ва алоқа тармоқларидаги кенг кўламли узилишлар ва бошқалар) туфайли мажбуриятларни бажармаганлик ёки лозим даражада бажармаганлик учун жавобгарликдан озод этилади.

12. Низоларни ҳал этиш тартиби

12.1. Ушбу Оферта юзасидан келиб чиқадиган низолар аввало музокаралар йўли билан ҳал этилади. Ёзма даъво (претензия) Маъмурият томонидан 15 (ўн беш) иш куни ичида кўриб чиқилади.

12.2. Келишувга эришилмаган тақдирда низолар Ўзбекистон Республикасининг амалдаги қонунчилигига мувофиқ суд тартибида ҳал этилади.

12.3. Ушбу Офертага Ўзбекистон Республикаси қонунчилиги қўлланилади.

13. Офертанинг амал қилиши ва ўзгартирилиши

13.1. Оферта Платформада эълон қилинган пайтдан бошлаб кучга киради ва муддатсиз амал қилади.

13.2. Маъмурият Офертага бир томонлама тартибда ўзгартириш киритиш ҳуқуқига эга. Янги таҳрир эълон қилинган пайтдан кучга киради. Фойдаланувчи ўзгаришлардан кейин Платформадан фойдаланишни давом эттирса, янги шартларни қабул қилган ҳисобланади.

13.3. Фойдаланувчи исталган вақтда ҳисобини ўчириш орқали Офертадан бир томонлама воз кечиши мумкин.

13.4. Офертанинг бирор қоидаси ҳақиқий эмас деб топилса, бу қолган қоидаларнинг амал қилишига таъсир этмайди.

14. Маъмурият реквизитлари

• Платформа: «Advokat Kerak» — advokatkerak.uz
• Электрон почта: инфо@advokatkerak.uz
• Телефон: +998 93 701 11 01
• Telegram: т.ме/адвокаткеракуз